يا ليل نجد، انصاه، خبّره عنّي
قله ترى قلبي لقلبه فداوي
قله رياح العشق هبّن وجني
قله ترى المضنى من العشق ذاوي
غلاك يا مشهاة قلبي فتني
ليتك ولو بالطيف ترحم وتاوي
أنا لهواك اليوم أطرب واغني
واردد الالحان ويّا الرجاوي
يا من ملك نزعات فكري وفني
انت الرجا، وانت الطبيب المداوي
لي في حدود العام حبٍ شطني
ولي مع جديد الوقت شوق وحراوي
ان قلت زانت وكّد الوقت ظني
وباعترف لك صرت انا اليوم غاوي
أجامل أيامي، وهن جاملني
جابن لي الخل الشفيق المداوي
في روعة الأيام ما خاب ظني
من يوم صار القلب للخل هاوي
خذ ما تبيه اليوم يا خل مني
وعطني من الايام كل الشقاوي
عطني الالم والحزن، وانت ارجهني
انا على الشـدات يالخل قاوي
الله يبيحه سارق القلب منـي
ليته ولو بالطيف يرحم وياوي
أنا اشهد انه بالغلا ماخذنّي
ياكيف ما يرحم عليل الشكاوي
حلم الليالي قرّبه حيل مني
أبي خياله لي رفيق مخاوي
ما شيّ يبعـدني ويبعـدك عني
انا الوفا وعلى الوفا اليوم ناوي
يا مرحبا بالعشق منك ومني
يا قبلة الله على ليل المهاوي
والله أحبك والهوى ممتحني
والله أعزك يا بعد كل ضاوي
مارح أخون الود، واحلف، واثني
والله، و والله، اني لك اليوم هاوي
فاصل
