البارحة في خاطري الهم طاويه *** والروح من حزنك تراها حـزيـنـة
أخوي يالعابر عسى الرب يبريه *** مـريضك اللي تنزعـج من ونينـه
تعذبـت ارواحنـا من مشاكيـه *** مانعرفـه ،، لكن عـزيـز علينـه
أسـال إله الكـون انه يشافـيه *** وينجـيـه من الام علـة مكيـنـه
ويطيب جرحه.. ولا عاد يشكيـه *** ويعود حلو الوقـت.. وتزهر سنينه
ياطول ليل الهم في عين سـاريه *** ومع الصبـر كـل المشـاكل هوينه
ماينكتب للعبد .. ماكان يخطيــه *** هذا وانا اختك موســـم به جبينه
الخير بالمكتوب ، ولو كان يضنيه *** حتى ولو كانت جـروحـه مكينـه
خطيئته تمحى.. وتكثـر حسـانيه *** ولا مايضر اللي متــمسك بدينـه
وش بايدنا ياخـوك حتى نسويـه *** آمــر ترانـا بعـزة الله عوينـه
طيبـك معانا نعـجـز انا نوفيـه *** فيك الـوفـا طبعٍ حبـاله متينـه
مـن ينتخي بك فانت بالروح تفديه *** وانا اشهـد انك للشهـامة مدينه
ماتنتظر مـدحٍ من الغيـر تجنيـه *** لكن عـدم مدحـك تراهو غبينـه
ماهو غـزل ياخـوك حتى أخبـيه *** مشاعري تحوي أخـــوة ثمينه
