محاورة بين صبا / عذب الكلام وبين العابر في أحد المنتديات. بدأتها صبا:
ودي أعيش الحب باقصى معانيه
ودي أصوغ القلب أحلى قصيده
ودي أساهر ليل خلي واناجيه
واتمثـل ابياتي وخلي يعيده
لاهوب في بيته ولابيتي أبغيه
لكن على رمال الثمامة أريده
قمرا وليل وضو وقلب أهاويه
ياقبلة الله عالليالي السعـيده
خلي انا يا ناس وش حيلتي فيه
ماهوب طايعني وخوفه يزيده
خوفه من الله هو اللي محليه
نفسه على الشيطان ياهي شديده
ارسم واخطط ثم أغريه واغريه
وهو العنيد اللي عشق له عنيده
يقول (( يا عذبة فلا والله أرضيه
شيطانك اللي من مكيدة لمكيده
لاتلعبي باعصاب خـلٍ يسليه
الحرف منك ، ولايبي مايزيده ))
عسى يجيبه درب ما عاد يوديه
ويومٍ بصحرا نجد عسانا نصيده
أها ،، وان صدناه وش انسوي به ؟؟ ابي اقتراحات لو سمحتوا!
فرد العابر :
ان كان صدتي حب خلك فراعيه
راعي هواه وفكي اليوم قيـده
كل الضروف اللي مضت ما تواسيه
ويمكن بعد للحين ماحط ايـده
الحب طيش وصدق واحساس نبنيه
(الحب اصلا هو قصيده فريده)
لا تبعدي يا بنت بالحب حاكيه
هزي كيانه سمعيه القصيده
ثم احفظي سره وحبيه حبيه
خلى غلاك يمر باقصى وريده
و اذا سهر واياك بالشوق ناجيه
وخلي حياته كل ابوها سعيده
ثم الوفـاء ثم الوفـاء ثم اغريه
ثم اغرسي ذكراك بارض بعيده
صبا هذا رايي وانتي طلبتيه
عابر عبر والراي مثل الحديده
