في صباح العيد، من بدري.. لم يغمض لي جفن قمت أحوس.. وأحوس.. كلهم نايمين.. يووه وش ذا الزهق
زين.. مو على بامستر زهق
دش.. ثم قهوة.. وبخور (يعني اني شخصية) أكيد يتغير الجو.. شربت قهوتي لاخر رشفة.. ولسه.. سهارى البارح يغطون في نوم عميق في نوم عميق
ورغم بعد المسافة بيني وبين توأم روحي أم خالد.. ورغم ان الوقت بدري عليهم بالرياض.. ولكن ماعليه.. خليني اتصل على جوالها.. ان كانه دق فمعناها انها صاحية.. فيكون هي اول من أعيد عليه
وفعلا ردت على.. لكن صوتها ضعيف ومتهدج.. برجتي المعهودة قلت لها
ـ صباح الخير..صباح العيد ..كل عام وانت بخير
………. ـ وانت بخير يا
ـ ليه صوتك كذا؟؟ عسى مانتي مريضة؟؟
ـ لا.. أبد مافيني الا العافية
قلت لها وانا مرتاعة
ـ خالد فيه شي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ـ لا.. لا
ـ طيب وش فيك.. أوجعت قلبي
(وهنا بدأ العياط… والمناشق)
قعدت اصرخ عليها بالتلفون
ـ وش فيكي؟؟ قولي لي وش فيكم بسرعة
ـ تعبانة.. زهقانة.. من صبح رب العالمين وهو منكد علي
(طبعا معروف منهو.. اكيد زوجها.. وهو يجي اصلا النكد الا من الرجال)
ـ اشوا الحمد لله.. جت سليمة.. وبس؟؟ قومي غسلي وجهك.. وكلميني انا انتظرك.. لاتتأخرين على
لما اتصلت قلت لها
ـ يلله هات من الاخر.. قصدي من الاول.. الله يعين اذني.. وبعدين وانت تحكين لاتبكين.. يوجعني قلبي.. وما عاد اعرف افكر
ـ السالفة باختصار انه من صبح رب العالمين.. وهو صاحي متنكد.. ويبي ينكد علي.. تخيلي يا (………..) انه لما صحا من النوم كنت صاحية ولابسة ومشخصة.. وملبسة خلودي.. ووش حليلنا.. وجيت أبي أخمه (بلغة نجد) يعني أضمه.. ابي اقوله مثل ما اقول في كل عام (كل عام وانت بخير.. كل عام وانت حبيبي) تعرفين وش سوى؟؟
دفني بايده بشويش وبقرف.. وقال يكلمني من راس خشمه: بعدي.. عني.. بعدي.. مال خلق.. مالي خلق
وبعد فواصل من البكا وتوابعه كملت: هذا مو عيد.. ياليتني كنت ما اتزوجت.. انا المجنونة
بصراحة انا اتلخبطت مااعرف وش اقول.. أي بالله للغزل اعرف.. وللغرام اعرف.. بس علاقات زوجية.. هذي تونا.. ياربيه وش ذا النشبة وش اقول لها؟؟ ياوالله الورطة.. مافيه الا حل واحد.. دايم اسمعهم يقولون في المسلسلات
ـ طولي بالك.. يمكن انه محلم انك متزوجه عليه
ـ تكفين أحر ماعندي.. أبرد ماعندك
ـ اسمعيني ياحرمة.. يعني مو غريب عليه من يوم ما اخذته وانتي عارفة انه طيب وحبيب.. وعارفته مزاجي.. ونار.. يعني اليوم مزاجه ملخبط.. اتحمليه.. صح انا معك في انه مايصير يسوي كذا في يوم العيد.. وكان لازم يروق ويطنش ويلغي احاسيس النكد اللي هو فيها ويمثل انه مبسوط لانه عيد.. لكن عاد مو من هالنوع.. خلاص طنشي.. ولاتقعدين تشدين معاه.. وبعدين انت عارفة ان كل اصدقائه ماهم في الرياض ولا اهله بعد يعني تخيلي أسبوع كامل يفطر ويتغدى ويتعشى ويسهر قدام وجهك.. وبصراحة يحق له يطفش وينغث
الى هنا انتهى
بس بصراحة -والكلام للمتزوجين- يوم العيد خوذوه
Off
من النكد والزعل.. نصيحة لوجه الله.. لاأريد منكم جزاء ولا شكورا